تاريخ التسجيل : 01/01/1970
 |  موضوع: خدمات الانترنت في ليبيا ((التروبين))  الأحد أغسطس 22, 2010 1:48 am | |
| .:: خدمات النت في ليبيا -- والتروبين ::.
شج الكل؟؟؟
طبعا اليوم بنتكلموا مع بعضنا هكي على موضوع مهم وهو التروبين في خدمة النت في ليبيا ...
وتنوع الخدمات . نبدوا نعرفوا الخدمات :
.::: المدار almadar:
نت المدار الأفضل والأرخص سعرا بين كل الخدمات اللي جاية ..
سعر الإشتراك : 10 د.ل شهريا .( رسالة نصية و10 دل من رصيدك تشاو)
السعة المحددة للتحميل: unlimited ( كانا وصلت لل 10 ميجا باهي ... طبعا مش قصدي السرعة لكن قصدي حجم الملفات... )
السرعة المعلنة للتصفح: 460 ك ب في الثانية ( وووه أسرع من الدي إس ل)
السرعة الحقيقية للتصفح : 30 ك ب وأعلى مرة وصلت 50 في الصبح جو الساعة 7 -8 هكي...
سرعة الداونلووود : 0.7 وتوصل إلى 15 مي.. عفوا ك ب في الثانية...
يعني لو فكرت في ملف حجمه 2 ميجا... تبي لك جو ساعة ... وكانا فكرت في ملف جو 15 ميجا ( عفوا إنت مهبول) ..
نصائح عامة :
في حالة عدم توفر خط تليفون أرضي أو رصيد في ليبيانا .. فهذه الخدمة هي الأفضل والأرخص... ويفضل إستخدام idm ( internet download manger) ,,, او أي برنامج مشابه ...
في بعض الأحيان يمكن إستعمال مقوي للتغطية يعطي مفعول وسرعة عالية ...
شعار هذه الخدمة..
.::: تصفح اليوتيوب.. أخر أحلامك :::.
................................
ليبيـــانا libyana:
هذه الخدمة الأكثر إستخداما حاليا خصيصا بعد التخفضيات الجديدة سعر الإشتراك : رسالة 5 قروش ...
التكلفة : هنا العملية بالتحميل ..
يعني لكل 1 ميجا... 200 درهم ...
السرعة المعلنة: 200 ك ب في الثانية
السرعة الحقيقية: 30 -50 ك ب في الثانية .
التحميل : UNLIMTED لكن من وين الرصيد .. الميجا ب200 درهم يعني 10 ميجا 2 دينار.. ومع السرعة هاديكا.. باهي باهي يعني معقولة..
هذه الخدمة للجماعة اللي عندهم رصيد في ليبيانا ويديروا في تشك للنت ما يخشوش يعني ديما ...
وبالنسبة للداونلوود سرعتها معقولة لكن تكلفتها مش معقولة ..
ممكن الواحد يتصفح ويهيج بيها في اليوم بدينار ...
بالنسبة لكيفية التوفير... في خطتين :
في حالة النقال: خش على الخيارات وإلغي الصور .. برا لgetjar ونزل ال opera mini و ebuddy او fring ....
خش على الأوبرا ميني ونحي الصور كانا تبي تصرف دراهم .. كان تبي شوية خليهم الصور عادي .. لأن الأوبرا يتصرف مع الصفحات يصغر فيها وينزل في سومها...
في حالة النقال موصل للكمبيوتر: ما عندكش هنا إلا تنحي كل الميديا والصور.. والجو هذا قصدي كانا تتصفح وسمعت ميوزك ما ... برا جيب كرت 5 طوول .. لأن الرصيد باي باي ....يعني ما عندكش حل إلا تنحي الميديا..
شعار هذه الخدمة:
.:: بالرصيد كل شي يصير::.
.............................
الدايل أب Dialup :
أقدم خدمة نت في ليبيا.. ..
قدمتها شركة ltt ... للمستخدمين ..منذ العصر الحجري...
سعر الإشتراك: مجاني حسب الشركة ...
سعر الإستخدام : يتم المحاسبة على الساعة كرت الفلك 10 دل .. = 14 ساعة ...
وفي نظام تاني تاخذ 40 درهم في الساعة .. وطبعا في شركات تاخذ على التليفون ...
وكانا جاتك مكالمة .. ديسكونيكت ديسكونيكت .. باي باي .. لين إتدير ديال تاني..
السرعة لهذه الخدمة : 40 ك.ب وتوصل ل 50 مرات.
شعار هذه الخدمة :
.::: ما نبيش حد يتصل بيا :::.
.................
ADSL +2:
والله الإسم يخلع ,., .. بس على منو ...
طبعا هذه الخدمة أحدثت طفرة في النت .. ودارت ضجة لي أول مرة سرعة خيالية موجودة ..وووه ,, مقيومة ..
طبعا السرعة العالمية للخدمة: 1024 ك.ب في الثانية.
السرعة المعلنة : 512 ك.ب
السرعة الحقيقية: كانا وصلت 100 ك.ب ما زيك حد ..
وووه من 1024 ل 100 ....
طبعا هادي مش سرعة الداونلوود : ما يفوتش ال 40 ك.ب ... وهذا خصيصا بعد الصيانة الأخيرة.. أول مرة نشوف صيانة تزيد تفسد ..
السعة المحددة للتحميل: 7 جيجا بس...
7 جيجا بس في الشهر يعني لو بدي الشهر عندك يوم 28 - يتم يوم 28 ب****ط ما فيش بصارة .. وكانا تم قبل الموعد شن بتدير..
في حلول :
ل تي تي تقدم الحلول لكل الجماهير..
إشري كرت ب 10 دل .. يساوي 500 ميجا.. اللي ما يسدوش يومين .. وب 20 1 جيجا... وزيد لوين ما تزيد ...
اخر يوم في الشهر .. كانا مازالك 7 جيجا.. مستحيلة مستحيلة تنضاف على الشهر اللي جاي.. شاو .. تطلعلك رسالة ( نشوفوك صدفة ) قصدي رصيدك تم..
ولو عبيت قبل الشهر ما يتم بتنحسبلك .. ميجات .. وكانا عبيت قبل الساعة 12 ربي يسهلك .. حظ أوفر في المرات القادمة ...
طبعا في طريقة للتكوليس على الشركة بس مكلفة شوية ..
الإشتراك في الستلايت .. وبعدين عمل الداونلوود على الستلايت .. والتصفح على الخط .. ال 7 جيجا ما تنقصش إلا جيجا والداونلووود سريع لكن المشكلة إن السعر يختلف يعني إنت وحظك .. وهذا ما يسمى بتقنية الون واي ... في ال2 واي ... لكن الحق ممنوعة ,, رغم في جماعة يديرو فيها...
طبعا في مرحلة البرود باند مش حنمروا عليها للأسف لأنهم نقزوا طوول للواي ماكس ..
شعار هذه الخدمة:
.:: حنسرقك يعني حنسرقك :::.
.................................................
الريفي:
هذه الخدمة الوحيدة اللي ما إستعملتهاش.. وهي طبعا إستخدمت فيها شركة البريد خبث كبير.. كيف؟؟
جو تجار المخدرات جو يعطو أول جرامات مجانا باش تدمن وتبدا تشري بالكيلو ..
فهم أعطوا شهرين فريي... وبدوا الجماعة يشروا في كرت 10 كل 3 ايام
طبعا التحميل : UNLIMTED
السرعة : زي الدايل أب ...
التكلفة : عبي كرت عشرة وتوا تفهم بروحك ..
شعار الخدمة:
.::: جيب العشرة ... شن مستني وين العشرة التانية ؟؟؟ :::.
...............................................
الـــــــــــــــواي ماكس :
معليش وسعوا وسعوا لجلالتها .. إنها الواي ماكس..
طبعا الخدمة هادي حديثة على مستوى العالم كله .. مش ليبيا بس.. قصدي ليبيا كانت سباقة بتوفيرها...
السرعة العالمية لهذه الخدمة : طبعا مفتوحة من 1 ميجا لين ممكن توصل 24 و 70 ميجا حتى ...
السرعة المعلنة : 2 ميجا ( السرعة القصوى .. هكي كاتبين ما تقدرش تشكي أقصى حاجة 2 ميجا لكن مش معروف تحصل ربعها تلتها كلها .. لكن مش حتفوتها )
السرعة الحقيقية : 1-6 ميجا ..
والتحميل : 300 ك. ب..
تعتبر القياسات كويسة...
لكن:
طبعا السرعة هادي وعدد المستخدمين 500 ممكن..
المستخدم رقم 1 بس لحق على ال 2 ميجا .. وبعدين كل مستخدم جديد ينحي في قداش كيلو هكي.. معناها لما يوصلو لل 300 ألف المعلنة ؟..؟؟؟ .... ربي يسهل....
طبعا : التقنية متحركة لا تحتاج لخيوط والجو هذا .. لكنها تبي قصيدة في العقد إتدخلها كانا بتحطها على كمبيوتر تاني..
بالنسبة للسعه المحددة : 10 جيجا في الشهر.. مافيش كيف تعرف قداش ما زالك .. .. يوم ما تم تقولك برا إشري كرت
..... تبي تغطية مليحة .. يعني سرعتها على تغطيتك ..
السعر : 520 دينار في السنة لل USB
و620 للروتر ,,, لأربعة أجهزة ... ( هاب ثابت )
الشهر : 40 دينار..
ومش ممكن تشترك إشتراك شهري يا سنة يا لا .. سبحان الله ... طبعا في شهرين فري.. هكي قالوا.
شعار هذه الخدمة:
.::: لحق لحق قبل الزحمة :::.
| |
|
